Orijin ak Nati nou
Gwo lide pou mete zouti sa a kanpe te jemen nan lakou Sen Jan Bosko nan lasalin lan nan mitan yon latriye jen, men batay sa a pral pran fòs aprè asasina twa jèn Gonayiv yo, 28 novanm 1985.
Solidarite Ant Jèn (SAJ) ak Konbit Veye Yo (SAJ/VEYE YO) se 2 òganizasyon ki fonde nan dat 10 janvye ak 23 me 1986. Se 2 gwoup jèn ki te konn fonksyone nan lakou Sen Jan Bosko, Lasalin Pòtoprens, ki te pran inisyativ mete òganizasyon sa yo kanpe nan sousi pou ride diferan gwoup sosyal mennen bon jan aksyon nan tèt kole pou yo kapab chanje kondisyon lavi yo. Nan lane 1989 aprè 2 lane pratik travay ansanm, 2 estrikti sa yo deside fonn ansanm ki vin bay SAJ/VEYE YO.

Solidarite Ant jèn Konbit Veye yo (SAJ/VEYE YO) se yon òganizasyon k ap travay ak divès gwoup sosyal nan katye popilè yo, patikilyèman Bèlè. SAJ/Veye yo bay tèt li kòm misyon: Pote kole nan batay pou tabli yon Leta ki gramoun tèt li, kote richès peyi a pataje san fòs kote. SAJ/Veye Yo pa yon òganizasyon ki chita sou la relijyon, ni li pa anba lobedyans okenn pati politik.

Rezon ki fè nou fòme SAJ/VEYE YO
a) Paske Ayiti gen yon sistem peze souse
b) Paske mas popilè yo, patikilyèman jèn yo, se prensipal viktim sistem lan.
c) Paske grenn moun pou kont li p ap janm rive nan yon solisyon konsekan.
d) Paske nou poko janm rive gen yon bon jan tèt kole tout sektè popilè yo nan aksyon n ap mennen pou lavni n kapab garanti.
e) Paske jèn yo, Fanm yo, Timoun yo reprezante plis pase mwatye nan popilasyon an.